Нацыянальны парк “Браслаўскія азёры” размешчаны на паўночным захадзе Рэспублікі Беларусь. Унікальнасць гэтага краю — у найчысцейшых азёрах і маляўнічых  хваёвых лясах, у якіх гняздуецца 189 відаў птушак,сустракаецца больш за 45 відаў млекакормячых, 6 відаў рэптылій.Усяго нацыянальны парк уключае ў сябе больш за 80 азёр. Найбольшыя па плошчы азёры — Дрывяты, Снуды, Струста, Недрава, Неспіш. А Богінскае возера — адно з самых прыгожых на Браслаўшчыне.

Захоўваецца ў межах нацыянальнага парку і шмат цікавых помнікаў прыроды. Гэта вялікія валуны, астравы на азёрах, рэдкія дрэвы. Ёсць помнікі гісторыі і культуры: гарадзішчы розных эпох, курганы, касцёлы і цэрквы.